महाराष्ट्र न्यूज वन प्रतिनिधी, कोल्हापूर :   कलामहर्षी बाबुराव पेंटर यांच्या जयंती निमित्त कोल्हापुरातील रंगबहार संस्थेच्या वतीने अभिवादन करण्यात आले. संस्थेचे अध्यक्ष धनंजय जाधव यांनी  पद्माराजे उद्यानातील पुतळ्यास पुष्पहार अर्पण केला.  याप्रसंगी रंगबहार चे सचिव संजीव संकपाळ, श्रीकांत डिग्रजकर, प्राचार्य अजेय दळवी, विजय टिपुगडे, सुधीर पेटकर, कला दिग्दर्शक सतीश बिडकर, बबन माने, राहुल रेपे, प्रा अभिजित कांबळे, सुदर्शन वंडकर, विजय उपाध्ये, सुभाष वाणी, पुष्कराज मेस्त्री उपस्थित होते. याप्रसंगी  कलामहर्षींच्या आठवणींचा जागर करण्यात आला. चित्रपटसृष्टीतील पहिलेवहिले तंत्रज्ञान बाबूराव पेंटर यांनीच रूढ केले आहे. यामध्ये भारतीय कॅमेर्‍याने चित्रित केलेला पहिला चित्रपट सैरंध्री असो, याच चित्रपटासाठी स्त्री कलाकाराकडून स्त्री पात्राची भूमिका असो, चित्रपटांचा सुवर्णकाळ सुरू करण्याचा प्रभातच्या आधी महाराष्ट्र फिल्म कंपनीचा मान असो, निर्मिती, वेशभूषा, ट्रिकसीन असो, की प्रसिद्धीसाठी पोस्टरचा वापर असो, ही सारी तंत्रे पेंटरांनी पहिल्यांदाच चित्रपटासृष्टीत रूढ केली चित्रकार,शिल्पकार ,तंत्रज्ञ,चित्रपट-निर्माते व दिग्दर्शक अश्या बहुआयामी कार्यामुळेच कलामहर्षी म्हणून ते गौरविले जात. प्रतिमा चित्रणातील कौशल्य व रंगभूमीवरील नेपथ्य. विशेषत: पडद्याची कलात्मकता या बाबतींत त्यांनी खूपच लौकिक मिळविला होता. बाबूराव पेंटर यांच्या चित्रकारितेने रसिकांना भुरळ घातली होती.    त्यांचे कलाकर्तृत्व उदंड मानावे लागेल असे जाणकारांनी नमूद केले.