महाराष्ट्र न्यूज वन प्रतिनिधी, कोल्हापूर : निवडणूक विधानसभेची असो की लोकसभेची…विरोधी आघाडीतून एकमेकांविरुद्ध. एक जण नेते मंडळीसाठी लढायचा तर दुसरे स्वत : मैदानात. दोन्ही गटात कमालीची ईर्षा. महापालिका सभागृहातही या दोन गटातील शह-काटशह रंगायचा. मात्र राजकारणात कोणी कोणी कायमचा मित्रही नसतो आणि शत्रूही…याची प्रचिती नुकतीच राजोपाध्येनगर येथे आली.

स्थायी समितीचे माजी सभापती शारंगधर देशमुख यांच्या पुढाकाराने शारंग कॅरम चषक स्पर्धा आयोजित केली होती. ‘कै. वसंतराव जयवंतराव देशमुख’ यांच्या स्मरणार्थ आायेजित या स्पर्धेच्या बक्षीस समारंभाला राजकीय नेते मंडळी उपस्थित राहिले…पालकमंत्री प्रकाश आबिटकर, खासदार धनंजय महाडिक, माजी नगरसेवक प्रा. जयंत पाटील आणि माजी नगरसेवक देशमुख यांच्यामध्ये कॅरम बोर्डवर स्पर्धा रंगली. आबिटकर-महाडिक एका बाजूला आणि पाटील-देशमुख एका बाजूला हे चित्र…कॅरम बोर्डवर हे एकमेकांविरुद्ध खेळताना दिसत असले तरी राजकीय पटलावर त्यांच्यामध्ये दोस्ताना झाला आहे.

माजी स्थायी समिती सभापती देशमुख हे शिवसेनेत प्रवेश करणार आहेत. उपमुख्यमंत्री एकनाथ शिंदे यांची भेट घेतली आहे. विधानसभा निवडणुकीपासून ते काँग्रेसपासून दुरावले. काँग्रेसचे जिल्हाध्यक्ष व आमदार सतेज पाटील यांचे ते कट्टर समर्थक अशी ओळख. विधानसभा, लोकसभा व महापालिका निवडणुकीत ते आमदार पाटील यांच्यासाठी किल्ला लढवायचे. समोर विरोधक म्हणून महाडिक. महापालिका सभागृहातही पाटील आणि महाडिक गटातील राजकीय वादाचे पडसाद उमटले. तेथेही ही मंडळी आपआपला गट सांभाळण्यासाठी पुढे. मात्र राजकारणात काही स्थिर नसते…याचे दर्शन घडत आहे.

विधानसभेपासून काँग्रेसपासून लांब गेलेले देशमुख आता महायुतीकडे झुकले आहेत. त्यांनी आयोजित कॅरम स्पर्धेच्या बक्षीस समारंभाला महायुतीचे नेते व पालकमंत्री आबिटकर, खासदार महाडिक उपस्थित राहिले. प्रा. जयंती पाटील ही उपस्थित होते. बदलत्या राजकारणाचे हे चित्र. या चौघांमध्ये कॅरमचा सामना रंगला. विजयी कोण होणार त्यांच्या निशाण्यावर कोण ? याची चर्चा मात्र रंगत आहे. याप्रसंगी माजी नगरसेवक विजय खाडे, अभिजीत चव्हाण,  सुनील देसाई आदी उपस्थित होते.

………………………

ना नजरानजर…ना बोलणे….हस्तांदोलन तर लांबच

बक्षीस समारंभाच्या कार्यक्रमाला शिवसेनेचे जिल्हा समन्वयक सत्यजित कदम ही उपस्थित होते. कदम हे जवळपास वीस वर्षे खासदार महाडिक यांच्यासोबत आहेत. कोणतीही निवडणूक असो त्यांचा सहभाग ठरलेला. दरम्यान विधानसभा निवडणुकीत खासदार महाडिक आणि सत्यजित कदम यांचे बिनसले. कदम यांनी भाजपातून शिवसेनेत प्रवेश केला. त्यांची खासदार महाडिक यांच्यावरील नाराजी अद्याप कायम असल्याचे कॅरम स्पर्धेच्या बक्षीस समारंभातही दिसले. बक्षीस समारंभाला एकत्र येऊनही त्यांच्यामध्ये ना नजरानजर झाली…ना बोलणे… हस्तांदोलन तर लांबच असे चित्र होते.