महाराष्ट्र न्यूज वन प्रतिनिधी, कोल्हापूर : करवीर गर्जना ढोल पथकातर्फे गुढीपाडव्यादिवशी, १९ मार्च रोजी शोभायात्रेचे आयोजन केले आहे. या शोभायात्रेत चित्ररथ, रंगाविष्कार दुचाकी पथक, मर्दानी खेळ, लेझीम पथक, मल्लखांब पथक, बालचमू वेशभूषा स्पर्धा, ढोल पथक असणार आहे. सकाळी नऊ  वाजता मिरजकर तिकटी येथून शोभायात्रेला प्रारंभ होईल. बिनखांबी गणेश मंदिर, महाद्वार रोड, पापाची तिकटी, माळकर तिकटी, ते छत्रपती शिवाजी चौक अशी शोभायात्रा निघणार आहे. ‘यंदा आपली माती, आपले खेळ’या संकल्पनेवर आधारित चित्ररथ आहेत.युवराज संभाजीराज छत्रपती, संयोगिताराजे छत्रपती, महापौर रुपाराणी निकम, उपमहापौर अक्षय जरग, नगरसेवक ऋतुराज क्षीरसागर, पश्चिम महाराष्ट्र देवस्थान समितीचे सचिव शिवराज नाईकवडे यांच्या उपस्थितीत शोभायात्रेला प्रारंभ होणार असल्याचे पत्रकार परिषदेत सांगण्यात आले. याप्रसंगी पथकाचे अध्यक्ष निखिल गावडे, उपाध्यक्ष युवराज जोशी, आशय बागल, विवेक माळी, श्रेया जोशी, निशांत जाधव, अजिंक्य शिंदे उपस्थित होते.