२५० वारकरी संप्रदायाच्या उपस्थितीत पाऊल भजन व श्री स्वामी समर्थ नामस्मरण जप महासोहळा

महाराष्ट्र न्यूज 1 प्रतिनिधी, कोल्हापूर :

कोल्हापूर येथे रविवारी (१३ नोव्हेंबर) दुपारी तीन ते सात या वेळेत श्री स्वामी समर्थ महाराज नामस्मरण जप सोहळा होत आहे. दत्त समर्थ सांस्कृतिक भवन व लॉन, शिवाजी पुलाजवळ, आंबेवाडी रोड येथे या कार्यक्रमाचे आयोजन केले आहे. अक्कलकोट येथील श्री स्वामी समर्थ अन्नछत्र मंडळचे प्रमुख कार्यकारी विश्वस्त श्रीमंत अमोलराजे भोसले यांची प्रमुख उपस्थिती असणार आहे. तरी सर्व स्वामी भक्तांनी या नामस्मरण जप सोहळ्याला उपस्थित रहावे, असे आवाहन संयोजकांनी केले आहे.

कोल्हापूर ते श्री क्षेत्र अक्कलकोट पदयात्रा भक्त मंडळ व महाद्वार स्वामी समर्थ भजनी मंडळ यांच्या वतीने या कार्यक्रमाचे आयोजन करण्यात आले आहे. कोल्हापूर ते अक्कलकोट इच्छापूर्ती पदयात्रेचे संस्थापक रमेश चावरे, अध्यक्ष अमोल कोरे, कार्याध्यक्ष सुहास पाटील यांनी पत्रकार परिषदेत यासंबंधीची माहिती दिली.

प्रवचनकार कुलदीप साळोखे यांच्या मार्गदर्शनाखाली २५० वारकरी संप्रदायाच्या उपस्थितीत पाऊल भजन व स्वामी समर्थ यांचा नामस्मरण जपसोहळा असा दुग्धशर्करा योग घडणार आहे. सायंकाळी पाच ते सहा या वेळेत नामस्मरण महाजपसोहळा होईल. सायंकाळी सहा ते सात पाऊल भजन नामस्मरण सोहळा होईल. सायंकाळी सात वाजता महाप्रसाद होईल. तर सव्वा सात वाजता वडणगे (ता. करवीर) येथील श्री स्वामी समर्थ भजनी मंडळाच्या वतीने सोंगी भजन होईल. कार्यक्रमाच्या यशस्वितेसाठी  पदाधिकाऱ्यांसह स्वामी भक्त दीपक कचरे, जगमोहन भुर्के, यशवंत चव्हाण, कुलदीप जाधव, अजय हांडे, सागर शिरगावे, सोमनाथ करपे, संदीप लव्हटे, राहुल जगताप, साताप्पा माने परिश्रम घेत आहेत