महाराष्ट्र न्यूज वन प्रतिनिधी   : महाराष्ट्र राज्य ग्रामीण जीवनोन्नती अभियानांतर्गत ग्रामीण भागातील महिला स्वयंसहायता समूहांच्या माध्यमातून उत्पादित होणाऱ्या विविध रानभाज्या व पारंपरिक खाद्यपदार्थांना बाजारपेठ उपलब्ध करून देणे, रानभाज्यांचे पौष्टिक व आरोग्यदायी महत्त्व नागरिकांपर्यंत पोहोचविणे तसेच ग्रामीण महिला उद्योजकांना प्रोत्साहन देण्याच्या उद्देशाने बुधवारी, ९ सप्टेंबर २०२६ रोजी रानभाजी महोत्सव आयोजित केला आहे. जिल्हा परिषदेच्या प्रांगणात हा महोत्सव होत आहे. जिल्हा परिषदेचे पदाधिकारी व अधिकाऱ्यांच्या उपस्थितीमध्ये महोत्सवाचे उद्घाटन होणार आहे.

महोत्सवामध्ये कोल्हापूर जिल्ह्यातील सर्व तालुक्यांमधून महाराष्ट्र राज्य ग्रामीण जीवनोन्नती अभियानांतर्गत कार्यरत महिला स्वयंसहायता समूह सहभागी होणार आहेत. विविध तालुक्यांतील समूहांकडून स्थानिक पातळीवर उपलब्ध होणाऱ्या विविध रानभाज्या, पारंपरिक खाद्यपदार्थ तसेच महिला समूहांनी तयार केलेल्या विविध उत्पादनांचे स्टॉल या महोत्सवामध्ये लावण्यात येणार आहेत. ग्रामीण महिलांच्या कौशल्य, उत्पादनक्षमता व उद्योजकतेला प्रोत्साहन देणारा हा महोत्सव ठरणार आहे. जिल्ह्यातील नागरिकांनी या रानभाजी महोत्सवास मोठ्या संख्येने उपस्थित राहून विविध रानभाज्या, पारंपरिक खाद्यपदार्थ व महिला स्वयंसहायता समूहांची उत्पादने जाणून घ्यावीत व ग्रामीण महिला उद्योजकांना प्रोत्साहन द्यावे, असे आवाहन केले आहे