महाराष्ट्र न्यूज वन प्रतिनिधी, कोल्हापूर : कोल्हापूर शेती उत्पन्न बाजार समितीच्या सभापतिपदी जनसुराज्य शक्ती पक्षाचे प्रकाश पांडुरंग देसाई यांची निवड झाली. उपसभापतिपदी राष्ट्रवादी काँग्रेस पक्षाच्या सोनाली शरद पाटील यांची निवड झाली. नूतन पदाधिकारी निवडीसाठी बाजार समितीच्या संचालक मंडळाची सोमवारी, (२४ जून २०२४) विशेष सभा झाली. प्राधिकृत अधिकारी डॉ. प्रिया दळणार यांच्या अध्यक्षतेखाली विशेष सभा झाली. या निवडीनंतर समर्थकांनी बाजार समितीच्या आवारात फटाक्यांची आतषबाजी केली. गुलाल उधळला
काँग्रेस, राष्ट्रवादी काँग्रेस, जनसुराज्यसह विविध पक्षांची संयुक्त आघाडी सत्तेत आहे. यापूर्वी काँग्रेसकडे बाजार समितीचे सभापतिपद होते. आघाडीच्या सत्ता फॉर्म्युलानुसार या निवडी झाल्या. काँग्रेसचे भारत पाटील-भुयेकर यांनी सभापतिपदाचा राजीनामा दिला होता. नूतन पदाधिकारी निवडीसाठी बाजार समितीच्या मल्टिपर्पज हॉलमध्ये संचालकांची विशेष सभा झाली.
सभापतिपदासाठी देसाई यांचे नाव संचालक सूर्यकांत पाटील यांनी सुचविले. संचालक शेखर देसाई यांनी अनुमोदन दिले. उपसभापतिपदासाठी पाटील यांच्या नावाला संचालक पांडुरंग काशीद सूचक आहेत. संचालक नानासो कांबळे यांनी अनुमोदन दिले. सभापती व उपसभापती पदासाठी प्रत्येकी एकेक अर्ज दाखल झाल्याने निवडणूक बिनविरोध झाली. यावेळी संचालक बाळासाहेब पाटील, मेघा देसाई, राजाराम चव्हाण, शिवाजीराव पाटील, संदीप वरंडेकर, सुयोग वाडकर, संभाजी पाटील कुडित्रेकर, नंदकुमार वळंजू, शंकर पाटील, सचिव जयवंत पाटील उपस्थित होते. उपसभापती सोनाली पाटील या माजी आमदार के पी पाटील यांच्या गटाचे आहेत. सभापती पदासाठी पांडुरंग काशीद इच्छुक होते. तर राष्ट्रवादीचे सूर्यकांत पाटील यांनी यावर्षी आपणाला पद नको असे नेते मंडळींना सांगितले होते.