महाराष्ट्र न्यूज वन प्रतिनिधी : राज्यातील सर्व माध्यम व व्यवस्थापनांच्या शाळांमधून ५ सप्टेंबर ते २० ऑक्टोबर या कालावधीत राबविले जाणारे ‘चला शाळेत जाऊया अभियान’ सुरु झाले आहे. जिल्ह्यासाठी महाराष्ट्र राज्य माध्यमिक व उच्च माध्यमिक शिक्षण मंडळाचे कोल्हापूर विभागीय अध्यक्ष राजेश क्षीरसागर यांची नोडल अधिकारी म्हणून नियुक्ती करण्यात आली आहे. "चला शाळेत जाऊया अभियान" अंतर्गत जिल्हा नोडल अधिकारी म्हणून ८ व ९ सप्टेंबर, २२ व २३ सप्टेंबर आणि ७ व ८ ऑक्टोबर, रोजी जिल्ह्यातील शाळा व क्षेत्रीय कार्यालयांना भेटी देऊन आढावा घेणार आहेत.

या अभियानांतर्गत जिल्ह्यातील गुणवत्तापूर्ण शिक्षण आणि शाळांमधील भौतिक सुविधा (शुद्ध पिण्याचे पाणी, स्वच्छ स्वच्छतागृहे, वर्गखोल्यांची दुरुस्ती व नवीन वर्गखोल्या, शाळा व परिसर स्वच्छता, क्रीडांगण व कुंपण भिंत, वीज, आवश्यक फर्निचर, ई-सुविधा). विद्यार्थ्यांचे गणवेश व पोषण आहार वितरणाची सद्यस्थिती व वेळेवर पुरवठा. गुणवत्ता विकासाचे विविध उपक्रम, सर्वेक्षण अहवाल व त्यानुसार आवश्यक सुधारणा. जिल्हा परिषदेच्या शाळांसाठी लोकसहभाग व सामाजिक दायित्व निधी (CSR) मिळवण्यासाठी प्रयत्न. विद्यार्थ्यांचे आरोग्य आणि जिल्ह्यातील शिक्षक व शाळा व्यवस्थापन समितीचे  सक्षमीकरण यांचा आढावा घेण्यात येणार आहे.दोन दिवसांच्या भेटीअंती प्रशासकीय व शैक्षणिक गुणवत्तेबाबत पालकमंत्री, जिल्हाधिकारी व मुख्य कार्यकारी अधिकारी यांची भेट घेऊन त्यांना परिस्थितीची माहिती दिली जाणार आहे, अशी माहिती प्राथमिक शिक्षणाधिकारी अशोक घुगे यांनी दिली आहे.