महाराष्ट्र न्यूज वन प्रतिनिधी -: युडायस प्रणालीमध्ये तांत्रिक कारणांमुळे आधार प्रमाणीकरण न झालेल्या विद्यार्थ्यांची गटशिक्षणाधिकारी यांचे मार्फत ऑफलाइन पडताळणी करून सदर विद्यार्थी ग्राह्य मानावी. २०२६-२७ ची संच मान्यता करण्यात यावी अशी मागणी महाराष्ट्र पुरोगामी प्राथमिक शिक्षक संघटनेने सरकारकडे केली आहे.

मागील वर्षी संचमान्यता करताना ज्या विद्यार्थ्यांचे आधार प्रमाणीकरण झालेले नव्हते, अशा विद्यार्थ्यांना संचमान्यतेसाठी ग्राह्य न धरता शिक्षक पदांची निश्चिती करण्यात आली होती. परिणामी, प्रत्यक्ष शाळेत शिक्षण घेत असलेल्या विद्यार्थ्यांची संख्या कमी दर्शविली गेल्याने अनेक शाळेतील शिक्षक पदे कमी मंजूर झाली. वास्तविक पाहता, आधार प्रमाणीकरण न होणे ही अनेक वेळा पूर्णतः तांत्रिक अथवा प्रशासकीय स्वरूपाची अडचण असते. विशेषतः इयत्ता पहिली व दुसरीतील लहान विद्यार्थ्यांच्या हातांच्या बोटांचे ठसे स्पष्ट उमटत नसल्यामुळे आधार प्रमाणीकरणात अडचणी निर्माण होतात. तसेच नाव, जन्मतारीख, इतर तपशीलांमधील किरकोळ तफावत किंवा तांत्रिक कारणांमुळे आधार नोंदी प्रमाणित होत नाहीत. अशा विद्यार्थ्यांचे प्रत्यक्ष शाळेत नियमित शिक्षण सुरू असून, त्यांना शासनाच्या विविध शैक्षणिक योजनांचा लाभ दिला जातो. यामध्ये मोफत गणवेश, पाठ्यपुस्तके, प्रधानमंत्री पोषण शक्ती योजना इत्यादी योजनांचा समावेश आहे. त्यांना संच मान्यतेत डावलणे हा त्यांच्यावर अन्याय आहे.
……………