महाराष्ट्र न्यूज वन  : महानगरपालिकेच्या प्राथमिक शिक्षण समितीमार्फत महानगरपालिका शाळांनी पुन्हा एकदा आपली गुणवत्ता सिद्ध केली. पूर्व उच्च प्राथमिक शिष्यवृत्ती परीक्षा (इयत्ता पाचवी) मध्ये ऐतिहासिक यश मिळवले आहे. नुकत्याच जाहीर झालेल्या निकालात महानगरपालिका शाळेतील २५ मुले राज्य गुणवत्ता यादीत तर ८७ मुले जिल्हा गुणवत्ता यादीत चमकून कोल्हापूरचे नाव उज्ज्वल केले आहे.

लक्ष्मीबाई जरग विद्यालयातील राज्य राज्य गुणवत्तेत पंधरा,  जिल्हा गुणवत्तेत ४२, नेहरूनगर विद्यामंदिरमधील राज्य गुणवत्तेत पाच जिल्हा गुणवत्तेत दहा, प्रिन्स शिवाजी विद्यालय जाधववाडी राज्य गुणवत्तेत दोन, जिल्हा गुणवत्तेत अकरा, टेंबलाईवाडी विद्यामंदिरमधील राज्य गुणवत्तेत दोन व जिल्हा गुणवत्तेत नऊ, पीएम श्री.महात्मा फुले विद्यालयमधील जिल्हा गुणवत्तेत नऊ, राजर्षी शाहू विद्यालय बावडामधील राज्य गुणवत्तेत एक, ज्योतिर्लिंग विद्यामंदिरमधील जिल्हा गुणवत्तेत तीन व रावबहाद्दुर विचारे विद्यालयमधील जिल्हा गुणवत्तेत तीन विद्यार्थ्यांचा समावेश आहे.

      महापालिका शाळांमधील विद्यार्थ्यांना दर्जेदार आणि गुणवत्तापूर्ण शिक्षण मिळावे यासाठी प्राथमिक शिक्षण समितीच्यावतीने इयत्ता पहिलीपासूनच विविध नाविन्यपूर्ण उपक्रम राबवले जात आहेत. विद्यार्थ्यांचा पाया मजबूत करण्यासाठी पहिली व दुसरीसाठी 'कोल्हापूर टॅलेंट सर्च', तिसरी व सहावीसाठी 'प्रज्ञाशोध परीक्षा', तर चौथी व सातवीच्या विद्यार्थ्यांसाठी 'स्कॉलरशिप सराव परीक्षा' नियमितपणे घेतल्या जातात. विशेष म्हणजे, अंतिम परीक्षेत यशस्वी होणाऱ्या विद्यार्थ्यांना राज्य शासना इतकीच शिष्यवृत्ती महानगरपालिकेकडूनही दिली जाते. अशी शिष्यवृत्ती देणारी कोल्हापूर महानगरपालिका ही राज्यातील एकमेव महानगरपालिका ठरली आहे. याशिवाय, चौथी  स्कॉलरशिप परीक्षेतील राज्य गुणवत्ता यादीत स्थान मिळवणाऱ्या भाग्यवान विद्यार्थ्यांना थेट विमानाने 'इस्रो'  अभ्यास दौऱ्यासाठी पाठवले जाते. दौऱ्याचा खर्च महानगरपालिका स्वतः करते. या यशाबद्दल महापौर रुपाराणी निकम, आयुक्त डॉ.राजेंद्र भारुड, उपायुक्त किरणकुमार धनवाडे, प्रशासनाधिकारी जयश्री जाधव यांनी विद्यार्थी व शिक्षकांचे अभिनंदन केले. शाळांना, प्राथमिक शिक्षण समितीकडील कार्यक्रम अधिकारी रसूल पाटील, शैक्षणिक पर्यवेक्षक बाळासाहेब कांबळे, विजय माळी, परीक्षा विभागाकडील संजय शिंदे यांचे सहकार्य लाभले.