महाराष्ट्र न्यूज वन प्रतिनिधी : महात्मा फुले यांच्या २०० व्या जयंतीनिमित्त त्यांच्या शैक्षणिक विचारांचा जागर आंतरभारती शिक्षण मंडळ, कोल्हापूर यांच्यावतीने करण्यात येणार आहे. संस्थेमार्फत वर्षभर व्याख्यान, चर्चासत्रे, विविध स्पर्धा होणार आहेत. अखिल भारतीय समाजवादी शिक्षण हक्क सभा आणि आंतरभारती शिक्षण मंडळ यांच्या संयुक्त विद्यमाने शनिवार दि. २५ जुलै रोजी संस्थेच्यावतीने या उपक्रमाचा भाग म्हणून सदर बाजार येथील कोरगांवकर हायस्कूलच्या सभागृहामध्ये सकाळी ११ ते १ या वेळेत शिक्षकांसाठी कार्यशाळेचे आयोजन करण्यात आले असल्याची माहिती आंतर भारती शिक्षण मंडळाचे माजी सचिव आणि ज्येष्ठ संचालक एम् .एस्. पाटोळे यांनी दिली.  कार्यशाळेत  अध्यापक सभेचे कार्याध्यक्ष आणि ज्येष्ठ विचारवंत डॉ. शरद जावडेकर आपले विचारपुष्प गुंफणार आहेत अशी माहितीही त्यांनी यावेळी दिली. या कार्यशाळेसाठी आंतरभारती विचाराच्या संलग्नित शाळांमधील शिक्षकांचा समावेश असणार आहे . एकूणच आंतरभारती विचारांच्या सर्वच शाळांमध्ये व्याख्याने, चचासत्रे, निबंध स्पर्धा, पथनाट्य स्पर्धा, मेळावे याद्वारे खऱ्या अर्थाने शैक्षणिक चळवळ विचारांचे मूर्त स्वरूप अंगिकारेल. यासाठी महात्मा फुले यांचे विचार पुन्हा पुन्हा समाजासमोर शिक्षकांच्या माध्यमातून पोहचवण्यासाठी आंतरभारतीने कंबर कसली आहे ऑगस्ट महिन्यामध्ये इयत्ता ८ वी ते १० वी च्या विद्यार्थ्यांसाठी व्याख्यान आयोजित करण्यात येणार आहे असेही त्यांनी सांगितले. मांगल्य हॉलमध्ये पार पडलेल्या या बैठकीस मुख्याध्यापक संजय सौंदलगे, मारुती शिणगारे, राजाराम संकपाळ, वृषाली कुलकर्णी यांचेसह रणधीर मिरजकर, इंद्रायणी पाटील, बाबासो डोणे, हेमलता पाटील, नेहा कटके, जयवंत साखरे आदी मान्यवर उपस्थित होते .