महाराष्ट्र न्यूज वन प्रतिनिधी  : महाराष्ट्र स्टेट गव्हर्मेंट कॉन्ट्रॅक्टर फेडरेशनचे राज्यस्तरीय अधिवेशन रविवारी (14 जून 2026 ) कोल्हापुरात होत आहे. या महाअधिवेशनामध्ये सरकारी कामांच्या कंत्राटदारांच्या विविध समस्या,  सरकारची धोरणे, विकासकामांमध्ये संधी तसेच फेडरेशनच्या भावी वाटचाली संदर्भात चर्चा होणार आहे. महासैनिक दरबार हॉल येथे सकाळी दहा ते सायंकाळी पाच या वेळेत हे महाअधिवेशन होणार असल्याची माहिती बापू लाड, सुनील नागराळे, किशोर जामदार, विजयसिंह सावंत,  प्रदीप पाटील,  यांनी पत्रकार परिषदेत दिली
 या अधिवेशनामध्ये संघटना बांधणी मार्गदर्शन, सार्वजनिक बांधकाम,  पाणीपुरवठा विभाग, ग्रामविकास विभाग, जलसंपदा व जलसंधारण विभाग नगर विकास विभाग यासह विविध विभागांचे प्रश्न, आंदोलनाची दिशा व संघटनेचे ठराव निश्चित केले जाणार आहेत. सरकारकडे  विविध विभागातील मिळून विकासकामे केलेली तब्बल  88 हजार कोटी रुपयांची कंत्राटदारांची बिले थकीत  आहेत. सरकारने वेळेवर थकीत बिले न दिल्यामुळे कंत्राटदारांची  अवस्था बिकट होत आहे. अनेक कंत्राटदारानी बँकेतून कर्ज काढून व्यवसायामध्ये रक्कम गुंतवले आहे. मात्र केलेल्या कामाचे बिल मुदतीत न मिळाल्यामुळे त्यांच्यावर कर्जाचा डोंगर वाढत आहे. या महाअधिवेशनामध्ये आंदोलनाची पुढील दिशा ठरवण्यात येणार आहे. राज्यभरातील 30 जिल्ह्यातून जवळपास 1000 प्रतिनिधी या महाअधिवेशनात सामील होणार आहेत. सरकारला संघटनात्मकरित्या ताकद दाखविण्याचा आणि सरकारी कंत्रांटदारांचे प्रलंबित प्रश्न सोडवण्यासाठी हे अधिवेशन उपयुक्त ठरेल असे लाड  व नागराळे यांनी सांगितले. " थकित बिले तत्काळ व पूर्णपणे द्यावेत,  ई टेंडर प्रक्रियेत पारदर्शकता व सुलभता आणावी, कंत्राटदार विरोधी नियम व अटी रद्द करावे, जीएसटी भरपाईचा लाभ तत्काळ मिळावा, किमान दर्जाच्या कामासाठी कंञाट रक्कम कपात थांबवावी, कंत्राटदाराना सन्मान व न्याय मिळाला पाहिजे ' अशा विविध विषयासंबंधी आंदोलनाची दिशा महाअधिवेशनात निश्चित केली जाईल असे विजय सावंत व प्रदीप पाटील यांनी सांगितले. या अधिवेशनासाठी प्रमुख पाहुणे म्हणून महाराष्ट्र जीवन प्राधिकरण कॉन्ट्रॅक्टर असोसिएशनचे अध्यक्ष राजू कृष्णानी, महाराष्ट्र राज्य शासकीय पाणीपुरवठा कंत्राटदार  संघटनेचे अध्यक्ष बाळासाहेब जाधव, महाराष्ट्र इंजिनिअरिंग असोसिएशनचे महासचिव एम ए हकीम, महाराष्ट्र राज्य स्थापत्य अभियंता संघटनेचे संस्थापक अध्यक्ष दिलीप मेदगे, कंत्राटदार कौशिक देशमुख, संजय मैद, सुबोध सरोदे, प्रवीण उंबरकर हे मार्गदर्शन करणार आहेत. या अधिवेशनासाठी कोल्हापूर जिल्हा गव्हर्मेंट कॉन्टॅक्टर असोसिएशन, कोल्हापूर जिल्हा शासकीय ठेकेदार संघ, कोल्हापूर जिल्हा शासकीय मटेरियल पुरवठा संघटना,  सार्वजनिक बांधकाम बिल्डिंग कॉन्ट्रॅक्टर असोसिएशन, कोल्हापूर कोल्हापूर व सांगली हॉट मिक्स प्लांट असोसिएशन,  सुशिक्षित बेरोजगार अभियंता संघटना आदी संघटना सहभागी होणार आहेत.पत्रकार परिषदेला जे.के. पाटील,  किशोर संजय पाटील,सोहम दळवी, बी एस पाटील आधी उपस्थित होते