महाराष्ट्र न्यूज वन प्रतिनिधी, कोल्हापूर : विविध प्रलंबित मागण्यांच्या सोडवणुकीसाठी महापालिका कर्मचारी संघाने २४ एप्रिल २०२५ च्या मध्यरात्रीपासून पुकारलेला बेमुदत संप स्थगित केला आहे. महापालिकेच्या प्रशासक के. मंजुलक्ष्मी व कर्मचारी संघाच्या पदाधिकाऱ्यांची बैठक झाली. या बैठकीत प्रशासनाने, कर्मचाऱ्यांच्या प्रश्नांच्या सोडवणुकीसाठी सकारात्मकता दर्शविली. यामुळे संप तात्पुरता स्थगित करण्यात येत असल्याचे कोल्हापूर महानगरपालिका कर्मचारी संघाचे अध्यक्ष दिनकर आवळे व मुख्य संघटक संजय भोसले  यांनी कळविले आहे.

पत्रकात म्हटले आहे, ‘ रिक्त पदे भरणे, ठोक मानधनवरील कर्मचाऱ्यांना कायम करणे व सातव्या वेतन आयोगातील तेरा महिन्याचा फरक हा अतिरिक्त आर्थिक भार निर्माण करणारा आहे. यामुळे याविषयासंबंधी आर्थिक स्थिती पाहून निर्णय घेण्याविषयी बैठकीत ठरले. उर्वरित वीस मागण्या २३ मे २०२५ पर्यंत पूर्ण करण्याचे आश्वासन प्रशासकांनी दिले आहे. यासंबंधीची जबाबदारी उपायुक्त, सहायक आयुक्त व कामगार अधिकाऱ्यांवर सोपविली आहे. ’