महाराष्ट्र न्यूज वन प्रतिनिधी, कोल्हापूर : कोल्हापूर जिल्ह्यातील नगरपालिका व नगरपंचायतीच्या निवडणुकीसाठी उमेदवारी अर्ज माघारीनंतर राजकीय चित्र स्पष्ट झाले.जिल्ह्यातील १३ नगरपालिका व नगरपंचायतीच्या नगराध्यक्षपदासाठी ५६ उमेदवार तर नगरसेवकपदासाठी ८०९ उमेदवार रिंगणात आहेत. कागल, जयसिंगपूर, गडहिंग्लज, कुरुंदवाड , हुपरी, हातकणंगले, आजरा, शिरोळ येथे बहुरंगी लढती आहेत. पेठवडगाव व चंदगडमध्ये नगराध्यक्षपदासाठी बहुरंगी तर मुरगुडमध्ये नगराध्यक्षपदासाठी दुरंगी लढत आहे.

 नगरपालिका व नगरपंचायतीसाठी दोन डिसेंबर २०२५ रोजी मतदान होणार आहे. हातकणंगले नगराध्यक्षपदासाठी सात, चंदगड नगराध्यक्षपदासाठी तीन, आजरा नगराध्यक्षपदासाठी सहा, हुपरी नगराध्यक्षपदासाठी सहा, शिरोळ येथे चार, मलकापूर व वडगाव येथील नगराध्यक्षपदासाठी प्रत्येकी तीन , मुरगुड व पन्हाळा नगराध्यक्षपदासाठी प्रत्येकी दोन उमेदवार आहेत. कुरुंदवाड नगराध्यक्षपदासाठी चार, कागल नगराध्यक्षपदासाठी पाच, गडहिंग्लज येथे सहा, जयसिंगपूर येथे पाच उमेदवार नगराध्यक्षपदासाठी लढत आहेत.

स्थानिक स्वराज्य संस्थाच्या निवडणुकीत राजकीय आघाडया निर्माण झाल्या आहेत. काही तालुक्यात तर टोकाचे राजकीय विरोधक मंडळी एकवटली आहेत. जयसिंगपूरमध्ये आमदार राजेंद्र पाटील यड्रावकर यांच्या विरोधात काँग्रेस, भाजप, स्वाभिमानी शेतकरी संघटना, राष्ट्रवादी शरद पवार एकवटले आहेत. कागलमध्ये मंत्री हसन मुश्रीफ व शाहू ग्रुपचे प्रमुख समरजितसिंह घाटगे यांची आघाडी आहे. या ठिकाणी माजी खासदार संजय मंडलिक हे या नव्या युतीच्या विरोधात लढाई करत आहेत. मुरगूडमध्ये राष्ट्रवादी अजित पवार पक्ष विरुद्ध भाजप, शिवसेना एकत्र लढत आहेत. येथेही मुश्रीफ विरुद्ध मंडलिक गट अशी लढत आहे. पन्हाळा नगरपालिकेन जनसुराज्य शक्ती पक्ष, भोसले गट, मोकाशी गट विरुद्ध अपक्ष अशी लढत या आहे. येथे आघाडीच्या सहा जागा बिनविरोध झाल्या आहेत.हातकणंगले नगरपालिकेसाठी भाजप, काँग्रेस, राष्ट्रवादी असे सगळे पक्ष रिंगणात आहेत. हुपरी येथे बहुरंगी लढत आहे.

चंदगड येथे आमदार शिवाजी पाटील यांच्या नेतृत्वाखालील भाजप व शिवसेना शिंदे गट एकत्र आहेत. याठिकाणी माजी आमदार राजेश पाटील, नंदिनी बाभूळकर यांची आघाडी आहे. वडगाव येथे सालपे व यादव या दोन गटाभोवती राजकारण फिरत आहे. मलकापूर येथे जनसुराज्य शक्ती पक्षाच्या विरोधात इतर सगळे पक्ष एकवटले आहेत. जनसुराज्यच्या विरोधात शिवसेना ठाकरे गट, राष्ट्रवादी अजित पवार पक्ष, स्वाभिमानी शेतकरी संघटना, शेतकरी कामगार पक्ष एकवटले आहेत. आजरा येथे काँग्रेसचे आमदार सतेज पाटील व भाजपाचे खासदार धनंजय महाडिक समर्थकांतच लढत आहे. महाडिक समर्थक अशोक चराटी यांची ताराराणी आघाडी आहे. कुरुंदवाड  व शिरोळ येथे आमदार राजेंद्र पाटील यड्रावकर यांच्या नेतृत्वाखालील राजर्षी शाहू आघाडीविरोधात भाजप, काँग्रेस, राष्ट्रवादी शरद पवार पक्ष व स्वाभिमानी शेतकरी संघटना अशी लढत आहे. गडहिंग्लजमध्ये जनता दल, जनसुराज्य शक्ती पक्ष, भाजप, शिवसेना विरुद्ध राष्ट्रवादी अजित पवार पक्ष अशी लढत आहे. दरम्यान उमेदवारी अर्ज माघारीच्या दिवशी राजकीय घडामोडी घडल्या. उमेदवार अर्ज माघारीसाठी साम, दाम, दंड या नितीचा वापर केला.