बिरदेव हा कागल तालुक्यातील यमगे येथील. कुटुंबांचा मेंढपाळाचा व्यवसाय. यामुळे सतत फिरण. मेंढया चारण्यासाठी सतत भटकंती. ज्या दिवशी यूपीएससी परीक्षेचा निकाल जाहीर झाला त्या दिवशी बिरदेव हा बेळगाव परिसरात मेंढया चारत होता. ना कसली शैक्षणिक पार्श्वभूमी, ना घरी कोण मोठे अधिकारी…केवळ जिद्द आणि चिकाटीच्या बळावर बिरदेवने लख्खं करणार यश मिळवलं. बिरदेव हा शालेय जीवनापासूनच हुशार विद्यार्थी म्हणून ओळखला जाई. जिल्हा परिषदेच्या शाळेत प्राथमिक शिक्षण झालं. विद्यामंदिर यमगे येथे प्राथमिक शिक्षण, तर जय महाराष्ट्र हायस्कूल यमगे येथे माध्यमिक शिक्षण झाले. दहावीच्या परीक्षेत ९६ टक्के आणि बारावी परीक्षेत ८९ टक्के गुण मिळवत मुरगुड केंद्रात प्रथम आला होता. गणित विषयात तर शंभर पैकी शंभर गुण मिळवले होते.

दहावीत मुरगूड केंद्रात प्रथम आल्यानंतर गावकऱ्यांनी सत्कार केला. त्याप्रसंगी बिरदेवने, आपण आयपीएस होणार असल्याचे सांगितले होते. आपलं ध्येय साध्य करण्यासाठी बिरदेव पुणे, दिल्ली गाठली. दिवसरात्र अभ्यास केला. स्थापत्य विभागातून पदवी प्राप्त केलेल्या बिरदेव हा ध्येयापासून कधी ढळला नाही. प्रामाणिकपणाने कष्ट केलं की यश प्राप्त होते हे त्यांनी कृतीतून दाखवून दिलं. बिरदेवचे यश हे अनेकांसाठी प्रेरणादायी ठरत आहे. परिस्थिती कशीही असो, स्वप्नं पाहायची, ती साकार करण्यासाठी अहोरात्र कष्ट करायचं आणि ध्येय गाठायचं….ही शिकवण अनेकांना करिअरच्या नव्या वाटा धुंडाळण्यासाठी प्रेरक ठरत आहे.