महाराष्ट्र न्यूज वन प्रतिनिधी, कोल्हापूर : शिवाजी विद्यापीठाच्या आवारात २६ सप्टेंबर रोजी मद्यपान करुन सुरक्षा कर्मचाऱ्यांना शिवीगाळ करणाऱ्या त्या प्राध्यापकाला कॉलेज व्यवस्थापनने नोटीस काढली आहे. महापालिकेच्या यशवंतराव चव्हाण कॉलेजमधील हा प्राध्यापक आहे. दरम्यान विद्यापीठाने, कॉलेजला प्रशासनाला पत्र पाठवून विद्यापीठ आवारात घडलेल्या घटनेविषयी कळविले आहे. २६ सप्टेंबरला रात्रीच्या सुमारास प्राध्यापक व त्यांचा आणखी एक सहकारी दुचाकीवरुन विद्यापीठात जात होते. यावेळी सुरक्षा कर्मचाऱ्यांनी त्यांना अडविले. यावेळी कर्मचाऱ्यांसोबत वादावादी झाली. संबंधित प्राध्यापकाने मद्यपान केले होते तसेच त्यांनी कर्मचाऱ्यांना शिवीगाळ केल्याची तक्रार विद्यापीठ प्रशासनाकडे झाली. सुरक्षा कर्मचाऱ्यांच्या तक्रारीनुसार विद्यापीठ प्रशासनाने, कॉलेजला पत्र पाठविले आहे. या प्रकरणाची चौकशी व प्राध्यापकावरील कारवाईचा अहवाल विद्यापीठाला कळवावा असे म्हटले आहे. त्यानुसार कॉलेज प्रशासनाने, त्या प्राध्यापकाला नोटीस काढून म्हणणे मागविले आहे.