महाराष्ट्र न्यूज वन प्रतिनिधी कोल्हापूर : राज्याच्या विधानसभा निवडणुकीसाठी उपमुख्यमंत्री अजित पवार यांच्या नेतृत्वाखालील राष्ट्रवादी काँग्रेस पक्षाने 38 उमेदवारांची पहिली यादी जाहीर केली यामध्ये स्वतः उपमुख्यमंत्री पवार हे बारामती मतदारसंघातून लढणार आहेत तर येवला मतदारसंघातून मंत्री छगन भुजबळ यांना उमेदवारी आहे. मंत्री दिलीप वळसे पाटील, धनंजय मुंडे यांचाही पहिल्या यादीमध्ये समावेश आहे. कोल्हापूर जिल्ह्यातील कागल मतदार संघातून मंत्री हसन मुश्रीफ यांना उमेदवारी जाहीर झाली. तर चंदगड विधानसभा मतदारसंघातून विद्यमान आमदार राजेश पाटील यांची उमेदवारी घोषित झाली. कागल मतदार संघामध्ये आता मंत्री मुश्रीफ यांच्या विरोधात राष्ट्रवादी शरद पवार गटाकडून समरजितसिंह घाटगे अशी थेट लढत होणार आहे. तर चंदगड मतदारसंघांमध्ये विद्यमान आमदार राजेश पाटील यांच्या विरोधात महाविकास आघाडी कोणाला उमेदवारी देणार हे अद्याप ठरलेले नाही या ठिकाणी राष्ट्रवादी शरद पवार गटाकडून नंदिनी बाभुळकर यांच्या नावाची चर्चा आहे. महाविकास आघाडीतील इतर स्थानिक नेते मंडळींनी एकत्र येऊन बाभुळकर यांना वगळून दुसऱ्यांना उमेदवारी द्या अशी मागणी केली आहे. त्यामुळे या मतदारसंघात महाविकास आघाडीचा उमेदवार ठरविण्यावरुन पेच निर्माण झाला आहे.