महाराष्ट्र न्यूज वन प्रतिनिधी, कोल्हापूर : मुंबई येथील डॉ. होमी भाभा राज्य विद्यापीठाचे  कुलगुरू डॉ. राजनिश कमलाकर कामत यांची डॉ. बाबासाहेब आंबेडकर तंत्रज्ञान विद्यापीठ लोणेरे येथे कार्यवाह कुलगुरू म्हणून नियुक्ती करण्यात आली आहे.राज्यपाल तथा कुलपती जिष्णू देव वर्मा यांच्या आदेशानुसार ही नियुक्ती झाली.  कामत यांन कार्यवाह कुलगुरू म्हणून पदभार स्वीकारला.कामत हे उच्च शिक्षण क्षेत्रातील एक प्रतिष्ठित व अनुभवी शैक्षणिक नेते असून त्यांना २८ वर्षांहून अधिक कालावधीचा अध्यापन, संशोधन व प्रशासनाचा अनुभव आहे. यापूर्वी त्यांनी शिवाजी विद्यापीठ, कोल्हापूर येथे विज्ञान व तंत्रज्ञान संकुलाचे अधिष्ठाता तसेच संगणक विज्ञान विभागप्रमुख म्हणून महत्त्वपूर्ण जबाबदाऱ्या सांभाळल्या आहेत.

विशेष म्हणजे, त्यांनी यापूर्वी पुण्यश्लोक अहिल्यादेवी होळकर सोलापूर विद्यापीठ, सोलापूर तसेच सर जे. जे. स्कूल ऑफ आर्ट, आर्किटेक्चर अँड डिझाइन (डी-नोवो दर्जा प्राप्त अभिमत विद्यापीठ) येथे कार्यवाह कुलगुरू म्हणून यशस्वीपणे काम पाहिले आहे. पदभार स्वीकारल्यानंतर डॉ. कामत यांनी सांगितले की, *“भारतरत्न महामानव डॉ. बाबासाहेब आंबेडकर यांच्या नावाने ओळखल्या जाणाऱ्या या विद्यापीठासाठी मी पूर्ण समर्पणाने आणि निष्ठेने कार्य करणार आहे. गुणवत्तापूर्ण शिक्षण, संशोधन आणि सामाजिक बांधिलकी यांना केंद्रस्थानी ठेवून विद्यापीठाच्या सर्वांगीण प्रगतीसाठी प्रयत्न करेन.”