महाराष्ट्र न्यूज वन प्रतिनिधी, कोल्हापूर : गीत-नृत्याचे बहारदार सादरीकरण, माहितीपटातून उलगडलेला चित्रपट दिग्दर्शक यशवंत भालकर यांचा जीवनप्रवास, कलाकारांनी नाटिकेतून संगीतसूर्य केशवराव भोसले नाट्यगृहाचे जतन करण्याचे व कलापूरचे सांस्कृतिक ओळख पुढे प्रवाहित ठेवण्यासाठी कार्यरत राहण्याचा केलेला संकल्प…आणि विविध क्षेत्रातील कर्तबगारांचा पुरस्कारांनी सन्मान…हा थाट होता भालकर्स कला अकादमी पुरस्कार सोहळयाचा.

‘चित्रपट दिग्दर्शक यशवंत भालकर फौंडेशन संचलित भालकर्स कला अकादमीतर्फे  गायन समाज देवल क्लब येथील गोविंदराव टेंबे रंगमंदिर येथे पुरस्कार वितरण सोहळा झाला. महाराष्ट्र गीताने कार्यक्रमाचा शुभारंभ झाला. यानंतर ‘यसबा एक झुंजार वादळ’ या माहितीपटातून  जीवनप्रवास उलगडला. यानंतर पुरस्कार वितरण करण्यात आले. कलामहर्षी बाबुराव पेंटर स्मृती कलासेवा पुरस्कार -जेष्ठ छायाचित्रकार अनिल वेल्हाळ यांना, चित्रतपस्वी भालजी पेंढारकर स्मृती चित्रसेवा पुरस्कार - ज्येष्ठ दिग्दर्शक सतीश रणदिवे यांना, कै.मदन मोहन लोहिया स्मृती नाट्यसेवा पुरस्कार - नाटयकर्मी दिलीप बापट यांना, संगीतकार यशवंत देव स्मृती संगीतसेवा पुरस्कार -  संगीतकार उमेश नेरकर यांना, कै. लक्ष्मण महालिंगा भालकर स्मृती सामाजिक लक्ष्यरत्न प्रेरणा पुरस्कार – डॉ. प्रविण कोडोलीकर यांना तर  मास्टरजी सुबलदा सरकार स्मृती  नृत्यसेवा पुरस्कार - जेष्ठ अभिनेत्री शोभा शिराळकर यांना प्रदान करण्यात आले.

विवेकानंद शिक्षण संस्थेचे मुख्य कार्यकारी अधिकारी कौस्तुभ गावडे, शिवाजी विद्यापीठ व्यवस्थापन परिषदेचे सदस्य अमरसिंह रजपूत, शिवाजी विद्यापीठातील विद्यार्थी विकास मंडळाचे माजी संचालक पी. टी. गायकवाड, अभिनेते आनंद काळे, अभिनेते देवेंद्र चौगुले, राष्ट्रपती आदर्श शिक्षक पुरस्कार विजेते शिक्षक व नृत्यदिग्दर्शक सागर बगाडे, कार्यक्रमाचे संकल्पन व नृत्य दिग्दर्शक संग्राम भालकर फौंडेशनचे अध्यक्ष संदिप भालकर, उपाध्यक्ष सपना जाधव -भालकर यांच्या प्रमुख उपस्थितीमध्ये पुरस्कार वितरण समारंभ झाला. अश्विनी टेंबे, शिवम गेजगे,स्वरा भालकर यांनी  सूत्रसंचालन केले. पुरस्कार वितरण समारंभानंतर झालेल्य सांगितीक कार्यक्रमात ७५ हून अधिक कलाकारांनी सादरीकरण केले.