महाराष्ट्र न्यूज 1 प्रतिनिधी, कोल्हापूर : अखिल भारतीय मराठी चित्रपट महामंडळातील राजकारण पुन्हा चिघळले आहे. महामंडळाचे उपाध्यक्ष धनाजी यमकर व अन्य संचालकांनी पत्रकार परिषद घेत मेघराज राजेभोसले यांच्यावर सडकून टीका केली. शिवाय भोसले यांनी जो निवडणूक कार्यक्रम जाहीर केला आहे तो बेकायदेशीर असल्याचे यमकर यांनी सांगितले.

यमकर म्हणाले, ‘महामंडळाच्या घटनेप्रमाणे भोसले हे सध्या अध्यक्ष पदावर नाहीत. यामुळे त्यांना निवडणूक कार्यक्रम जाहीर करण्याचा नैतिक अधिकार नाही. आमचे डिपॉझिट जप्त करतो म्हणणाऱ्या भोसले यांनी येत्या निवडणुकीत आम्हा संचालकांच्या विरोधात निवडणूक लढवून दाखवावी’ असे खुले आव्हान यमकर यांनी दिले.

यमकर म्हणाले,‘मेघराज भोसले यांनी गेल्या तीन वर्षात महामंडळात मनमानी कारभार केला आहे. धक्कादायक म्हणजे २०२०-२१ चा ऑडीट रिर्पोट सर्व संचालकांच्या मंजुरीशिवायच धर्मादाय कार्यालयास सादर केला आहे. ऑडीटची सर्व कागदपत्रे मुख्य कोल्हापूर कार्यालयात असताना लेखाजोखा कसा केला ? त्यांच्या मनमानीकारभाराला सभासद कंटाळले आहेत. सभासदांच्या इच्छेनुसार आम्ही नव्याने अधिकृत निवडणूक कार्यक्रम जाहीर करत आहोत.

……………..

निवडणूक कार्यक्रम पुढीलप्रमाणे….

यमकर यांनी निवडणूक घेण्याविषयी जाहीर केले. यानंतर रणजित जाधव यांनी निवडणूक कार्यक्रम जाहीर केला. ३ ऑक्टोबर रोजी सभासदांची पक्की यादी जाहीर होईल. १० ते १५ ऑक्टोबर दरम्यान उमेदवारी अर्ज वाटप होईल. २५ ते २८ ऑक्टोबरमध्ये उमेदवारी अर्ज मागे घेण्याची मुदत आहे. एक नोव्हेंबर रोजी निवडणुकीस पात्र उमेदवारांची चिन्हासह अंतिम यादी प्रसिद्ध होणार आहे. १३ नोव्हेंबर रोजी मुंबई,पुणे, कोल्हापूर येथे मतदान होईल. तर १५ नोव्हेंबर रोजी मतमोजणी आहे.

……………….

तेरा नोव्हेंबरला मतदान

उपाध्यक्ष यमकर म्हणाले, “कायदेशीर बाबी तपासून आणि तज्ज्ञांचा सल्ला घेउन निवडणूक कार्यक्रम जाहीर केला आहे. त्यानुसार महामंडळाच्या निवडणुकीसाठी तेरा नोव्हेंबर रोजी मतदान होईल तर १५ नोव्हेंबर रोजी मतमोजणी होणार आहे. ॲड. के. व्ही.पाटील हे मुख्य निवडणूक अधिकारी असतील तर पराग भवसार (मुंबई),अशोक सासने (मुंबई), संतोष साखरे (पुणे),आनंद कुलकर्णी (कोल्हापूर), अरुण भोसले-चोपदार (कोल्हापूर) यांची निवडणूक समिती असेल.

पत्रकार परिषदेला सतिश बिडकर, विजय शिंदे, अमर मोरे,  उपस्थित होते.