महाराष्ट्र न्यूज वन प्रतिनिधी -:  पुणे विभागीय शिक्षक मतदारसंघातील शिवसेनेने पाठिंबा दिलेले उमेदवार सचिन सानप यांच्याकडून शिक्षक मतदारांना लक्ष्मीदर्शन केले जात आहे. शिक्षक मतदारसंघातील निवडणुकीत चुकीचे पायंडे पाडले जात आहेत. सानप यांच्याकडून मतदारांना पैसे वाटप करत असल्याचा व्हिडिओ आपल्याकडे आहे.’असा हल्लाबोल काँग्रेसचे नेते व आमदार सतेज पाटील यांनी केला.

पुणे विभागीय शिक्षक मतदारसंघाच्या निवडणुकीत बारामती येथील उमेदवार प्रफुल्ल तावरे यांनी महाविकास आघाडीतंर्गत काँग्रेसचे उमेदवार प्रा. जयंत आसगावकर यांना पाठिंबा दिला. यासंबंधी बुधवारी, ()२१ ऑक्टोबर २०२६) कोल्हापुरात पत्रकार परिषद झाली. या पत्रकार परिषदेत बोलताना आमदार पाटील यांनी निवडणुकीतील गैरप्रकारावरुन महायुतीवरही निशाणा साधला. ‘भाजपचे दोन्ही उमेदवारही मतदारांना लक्ष्मीदर्शन घडवित असल्याचा आरोप त्यांनी केला. शिक्षक व पदवीधर मतदारसंघातील निवडणूकही शिक्षक व पदवीधरांचे प्रश्न, त्यांच्यासमोरील आव्हाने, पुढील धोरण, शिक्षण क्षेत्राशी निगडीत समस्येवर आधारित व्हायला पाहिजे. मात्र गेले दोन ते तीन दिवस शिवसेनेच्या सचिन सानप यांच्याकडून मतदारांना लक्ष्मीदर्शन सुरू झाला आहे. पुण्यातून सुरू झालेला लक्ष्मीदर्शनाचा प्रवास आता कोल्हापूरपर्यंत पोहोचला आहे. यासंबंधी शिक्षकांच्या तक्रारी येत आहेत. सानप यांच्याकडून निवडणुकीत चुकीचे पायंडे पाडले जात आहेत.’असा आरोपही पाटील यांनी केला.

पुणे विभागीय पदवीधर व शिक्षक मतदारसंघात महाविकास आघाडीचे दोन्ही उमेदवार निवडून येतील. महायुतीच्या पदवीधरमधील उमेदवार स्मिता जाधव या आमदार पाटील यांच्या भाची आहेत. याकडे लक्ष वेधले असता आमदार पाटील म्हणाले, ‘पुणे पदवीधर मतदारसंघासंबंधी माझी भूमिका यापूर्वी मी स्पष्ट केली आहे. महाविकास आघाडीच्या उमेदवार हर्षदा देशमुख यांना आमचा पाठिंबा आहे. माझ्या पक्षाची भूमिका आहे. महाविकास आघाडी म्हणून आम्ही लढत आहोत. माझेही करिअर आहे. मी, काँग्रेस पक्षाचा आहे.’