महाराष्ट्र न्यूज वन प्रतिनिधी, कोल्हापूर : जिल्हा नियोजन समितीची पुढील बैठक ही सदस्यांना घेऊनच होईल’अशी स्पष्ट  ग्वाही पालकमंत्री प्रकाश आबिटकर यांनी दिली. पालकमंत्र्यांच्या या ग्वाहीमुळे स्थानिक स्वराज्य संस्थेतील नगरसेवक व जिल्हा परिषद सदस्य यांची जिल्हा नियोजन समितीवर लवकरच निवड होणार असल्याचे स्पष्ट झाले.

 पालकमंत्री आबिटकर यांच्या अध्यक्षतेखाली जिल्हा नियोजन समितीची बैठक सोमवारी, एक जून २०२६ रोजी झाली. या बैठकीनंतर पत्रकार परिषद झाली. यावेळी पत्रकारांनी महापालिकेतील नगरसेवक व जिल्हा परिषद सदस्यांची जिल्हा नियोजन समितीवर कधी निवडी होणार असा प्रश्न केला. त्यावर पालकमंत्री आबिटकर म्हणाले, ‘स्थानिक स्वराज्य संस्थेतंर्गत नगरपालिका, महापालिका व जिल्हा परिषदेच्या निवडणुका एका नंतर एक झाल्या. या निवडणुकीच्या कालावधीत जवळपास चार महिन्याचा कालावधी गेला. यामुळे सदस्यांच्या निवडी राहिल्या. जिल्हा नियोजन समितीच्या पुढील बैठकीअगोदर सदस्यांच्या निवडी केल्या जातील. सदस्यांना घेऊनच जिल्हा नियोजन समितीची बैठक होईल.तसेच महामंडळावरील पदाधिकाऱ्यांच्या निवडीही नजीकच्या काळात होतील. महायुतीमध्ये समन्वय समितीत सहा सदस्य आहेत. या समन्वय समितीतंर्गत महामंडळावरील निवडीसंबंधी चर्चा झाली आहे.’ पत्रकार परिषदेला आमदार राजेश क्षीरसागर, आमदार शिवाजी पाटील आदी उपस्थित होते.