महाराष्ट्र न्यूज वन प्रतिनिधी : महाराष्ट्र राज्य माध्यमिक व उच्च माध्यमिक शाळा कृती समिती - कोल्हापूर यांच्यावतीने 22 ऑगस्ट 2026 रोजी डॉ. बापूजी साळुंखे स्मृतीभवन विवेकानंद कॉलेज, कोल्हापूर येथे दुपारी दोन वाजता जुनी पेन्शन योजना निर्धार मेळावा आयोजित केला आहे. कोल्हापूर जिल्ह्यातील १ नोव्हेंबर २००५ पूर्वी नियुक्त शिक्षकांनी मोठ्या संख्येने उपस्थित राहावे असे आवाहन केले आहे. एक नोव्हेंबर २००५ पूर्वी नियुक्त्त विना अनुदानित /अंशतः अनुदानित, कायम आस्थापनेवरील, नियमित वेतन श्रेणीतील व तद्नंतर १०० टक्के अनुदान प्राप्त प्राथमिक, माध्यमिक व उच्च माध्यमिक शाळा व तुकड्यांवरील शिक्षक / कर्मचाऱ्यांना देय १९८२ ची जुनी पेन्शन योजना नियनित करणेबाबत गेली अनेक वर्षे सरकारी स्तरावर तसेच काही पेन्शन पिडीत बांधव सर्वोच्च न्यायालयात प्रयत्न करीत आहेत. नऊ-दहा वर्षे विनाअनुदानित सेवा करून तदनंतर १०० टक्के अनुदानांवरती कार्यरत आहेत. यापैकी हजारो शिक्षक-कर्मचारी सेवानिवृत्ती नंतर विना पेन्शन जीवन जगत आहेत. राज्यातील सुमारे २६००० शिक्षक / कर्मचाऱ्यांना देय जुनीच १९८२ ची पेन्शन योजना नियमित करण्याबाबत शासनाचे लक्ष वेधून घेण्यासाठी पेन्शनचा निर्णायक लढा कोल्हापूर मधून सुरु करण्याचा निर्धार करून हजारो पेन्शन पिडीत बांधवांचा हा एल्गार मेळावा आयोजित करीत आहोत. या मेळाव्याच्या नियोजनासाठी दादासाहेब लाड, बाबासाहेब पाटील,  सुरेश संकपाळ,दत्ता पाटील आदींच्या उपस्थितीमध्ये बैठक झाली.