महाराष्ट्र न्यूज वन प्रतिनिधी, कोल्हापूर  : ‘दूध व्यवसाय टिकवून नफ्यात नेण्यासाठी आधुनिक व शास्त्रीय दृष्टिकोन स्वीकारणे गरजेचे आहे. स्थानिक जनावरांच्या तुलनेत जातीवंत म्हैशी अधिक दूध देतात. त्यामुळे दूध उत्पादक शेतकऱ्यांचे उत्पन्न वाढून त्यांची आर्थिक स्थिती भक्कम होऊ शकते.’असे मत गोकुळचे संचालक अभिजीत तायशेटे यांनी व्यक्त केले.

कोल्‍हापूर जिल्‍हा सहकारी दूध उत्पादक संघाच्यावतीने राबविण्यात येत असलेल्या ‘स्वर्गीय आनंदराव ज्ञानदेव पाटील (चुयेकर) म्हैस दूध वाढ व गुणवत्ता सुधारणा कृती कार्यक्रम २०२५–२६’ अंतर्गत राधानगरी येथे प्राथमिक दूध संस्था सचिवांची विभागीय मिटिंग राधानगरी येथे उत्साहात पार पडली. दूध उत्पादनात लक्षणीय वाढ करण्यासाठी पारंपरिक पद्धतींना फाटा देत जातीवंत म्हैशींची खरेदी व सुधारित संगोपन पद्धतीचा अवलंब करण्याचा निर्णय या मिटिंगमध्ये घेण्यात आला.

 गोकुळचे पशुसंवर्धन व्यवस्थापक डॉ. प्रकाश साळुंके यांनी उपस्थित दूध संस्था सचिवांना जनावरे खरेदी करताना आवश्यक पारख, खरेदीनंतरचे हवामान व आहार व्यवस्थापन तसेच कमी खर्चात अधिक दूध उत्पादन कसे मिळवता येईल, याबाबत माहिती दिली. दरम्यान, के.डी.सी.सी. बँकेचे निरीक्षक रामभाऊ इंगळे यांनी शेतकऱ्यांसाठी उपलब्ध असलेल्या विविध कर्ज योजनांची माहिती देत म्हैस खरेदीसाठी बँकांकडून मिळणाऱ्या अर्थसहाय्याची प्रक्रिया स्पष्ट केली.

लहान संस्थांच्या सचिवांनी किमान दोन तर मोठ्या संस्थांच्या सचिवांनी किमान चार ते पाच जातीवंत जनावरे खरेदी करण्याचा निर्धार करण्यात आला. बोरवडे शीतकरण केंद्राचे दूध संकलन अधिकारी राजेंद्र चौगले, सहाय्यक दूध संकलन अधिकारी पी.डी.चव्हाण, मुकुंद पाटील उपस्थित होते.