महाराष्ट्र न्यूज वन प्रतिनिधी, कोल्हापूर :

कोल्हापूर जिल्हा माध्यमिक शिक्षक व कर्मचारी पतपेढी या संस्थेच्या २०२३ ते २०२८ या पंचवार्षिक निवडणुकीसाठी सात जानेवारी २०२४ रोजी मतदान होत आहे. १७ जागेसाठी १३३ उमेदवारी अर्ज दाखल आहेत. २६ डिसेंबर २०२३ पर्यंत अर्ज माघारीची मुदत आहे. गेल्या निवडणुकीत राजर्षी शाहू स्वाभिमानी परिवर्तन पॅनेलने सर्व जागा जिंकल्या होत्या.

कोजिमाशि पतपेढीवर सध्या आमदार जयंत आसगावकर यांच्या नेतृत्वाखालील सुकाणू समितीची सत्ता आहे. सत्तारुढ आघाडीच्या या सुकाणू समितीमध्ये वसंतराव देशमुख, बापूसाहेब शिंदे, के. के. पाटील, उदय पाटील, व्ही. जी. पोवार, संजयसिंह कलिकते व आर. एस. मर्दाने यांचा समावेश आहे.

शिक्षक नेते दादासाहेब लाड व पतपेढीचे माजी चेअरमन विलास साठे यांच्या नेतृत्वाखाली काम करणाऱ्या अनेक शिक्षकांनी उमेदवारी अर्ज दाखल केले आहेत.एकूण सतरा जागा आहेत. पतपेढीचे मतदानास पात्र सभासद संख्या १८२० इतकी आहे. यामध्ये सर्वाधिक करवीर तालुक्यातील आहेत. करवीरमध्ये ८१० तर शाहूवाडी, पन्हाळा तालुक्यात प्रत्येकी २६० सभासद आहेत. कागल तालुक्यात २१०, हातकणंगलेत ११०, गगनबावडा तालुक्यात १०० आहेत. भुदरगडमध्ये २५, शिरोळमध्ये १५, गडहिंग्लजमध्ये दहा, आजरा व चंदगड तालुक्यात प्रत्येकी पाच मतदान आहे.