करवीर तालुक्यातील सडोली खालसा या गावात नवरदेवाने लग्नाच्या वरातीत बारा बोअरच्या बंदुकीतून हवेत गोळीबाराचा प्रकार घडला. या प्रकरणी करवीर पोलीस ठाण्यात नोंद झाली आहे. नवरदेव अजयकुमार  हे  जिल्हा परिषदेचे माजी सदस्य आणि साखर कारखान्याचे माजी उपाध्यक्ष अशोकराव पवार यांचा  पुत्र आहे.

करवीर पोलिसांनी या घटनेची माहिती दिली. चौदा डिसेंबर रोजी करवीर पोलीस ठाण्याचे निरीक्षक अजयकुमार सिंदकर यांना मोबाईलवर सोशल मीडियवरुन एक व्हिडिओ आला. या व्हिडिओची खातरजमा करण्यासाठी त्यांनी पोलीस कर्मचारी बालाजी भूषण हांगे यांना सांगितले. बालाजी हांगे आपल्या सहकाऱ्यांना घेऊन सडोली खालसा या गावी पोहोचले. त्या ठिकाणी अजयकुमार अशोकराव पवार पाटील यांच्या लग्नाची वरात सुरू होती. पोलिसांनी वरातीत सहभागी झालेल्या नागरिकाकडे गोळीबाराची खातरजमा करून घेतली. त्यांनी जयकुमारांना गोळीबाराचा व्हिडिओ दाखवला. पवार यांनी वरातीत हवेत बंदूक उडविल्याची कबुली दिली. लग्नाच्या वरातीत बंदुकीने हवेत गोळीबार करायची आमची परंपरा आहे. आपल्याकडे बंदुकीचा परवाना असून बंदुकीतून ब्लॅंक काडतूस उडवले असल्याची कबुली दिली. तसेच बंदूक घरात ठेवली असल्यासही  सांगितले. गर्दीच्या ठिकाणी हवेत गोळीबार केल्याप्रकरणी करवीर पोलीस ठाण्यात गुन्हा नोंद झाला आहे.

दरम्यान ब्लॅंक काडतुसामधील छरे आणि दारू काढली जाते. ब्लॅंक काडतूस हे बंदूकीची चाचणी घेण्यासाठी वापरली जाते. या काडतुसाचा धोका नसतो असे बंदुक तज्ज्ञांनी सांगितले. तरीही गर्दीच्या ठिकाणी हवेतून गोळीबार केल्याचे समोर आल्याचे पोलिसांचे म्हणणे आहे.