चेअरमन महादेव डावरे यांची माहिती, कर्जाचा व्याजदर पावणेदहा टक्के

महाराष्ट्र न्यूज 1 प्रतिनिधी, कोल्हापूर : खाजगी प्राथमिक शिक्षक सेवक सहकारी पतसंस्थेला अहवाल सालात १ कोटी ६० लाख रुपयांचा नफा झाला आहे. त्यातून सभासदांना ४0 टक्के लांभाश देणार असल्याची घोषणा पतसंस्थेचे चेअरमन महादेव डावरे यांनी केली. संस्थेतर्फे यंदा विक्रमी लाभांश जाहीर  करण्यात आला आहे. 

चेअरमन महादेव डावरे म्हणाले, “पतसंस्थेने चालू साली ३५० कोटीची उलाढाल केली आहे. संस्थेला अहवाल सालात एक कोटी साठ लाख इतका विक्रमी नफा झाला आहे.त्यांतून सभासदांना १५ टक्के डिव्हिडंड व सभासद भेट म्हणून २५ टक्के असा एकूण ४० टक्के लाभांश देण्यात येणार आहे. तसेच सभासदाला देण्यात येणाऱ्या कर्जाच्या व्याजदरांत कपात केली असून सभासदांना पावणेदहा टक्के दराने ४५लाख कर्ज देण्यात येईल.”

संस्थेचे संस्थापक भरत रसाळे यांनी सभासद कर्ज मुक्ती योजना व संस्थेच्या मालकीच्या ' शिक्षक सभागृह ' उभारणीबाबत मार्गदर्शन केले संचालक शिवाजी भोसले यांनी प्रास्ताविक केले. सभेत संतोष आयरे, राजेंद्र कोरे, एस. डी. कासार, टी. आर. पाटील, दशरथ कांबळे, शिवाजी सोनाळकर, गोरख वातकर यांनी विविध व विषयासंबंधी सूचना केल्या.