महाराष्ट्र न्यूज वन प्रतिनिधी, कोल्हापूर : कोल्हापूर जिल्हा सहकारी दूध उत्पादक संघाच्या (गोकुळ)चेअरमनपदी अरुण गणपतराव डोंगळे यांची एकमताने निवड झाली.
सहकारी संस्था (दुग्ध पुणे विभाग) विभागीय उपनिबंधक व निवडणूक अधिकारी डॉ.महेश कदम यांच्या अध्यक्षतेखाली झालेल्या संचालकांच्या बैठकीत निवड झाली. गोकुळ शिरगाव येथील गोकुळ प्रधान कार्यालयात बैठक झाली.
गोकुळमधील सत्ता बदलानंतर पहिले दोन वर्षे ज्येष्ठ संचालक विश्वास पाटील यांनी चेअरमनपदाची धुरा सांभाळली. निवडणुकीतील सत्तापॅटर्ननुसार दोन वर्षाच्या कालावधीनंतर विश्वास पाटील यांनी चेअरमनपदाचा राजीनामा दिला. पाटील यांच्यानंतर डोंगळे यांना चेअरमनपद देण्याचे ठरले होते. गोकुळमधील सत्ताधारी आघाडीचे नेते व आमदार हसन मुश्रीफ, सतेज पाटील, विनय कोरे, खासदार संजय मंडलिक, आमदार प्रकाश आबिटकर यांच्यामध्ये झालेल्या चर्चेतही डोंगळे यांच्या चेअरमनपदाबाबत एकमत होते.
चेअरमन निवडीसाठी गुरुवारी (ता.२५ मे) संचालकांची बैठक झाली. चेअरमनदासाठी डोंगळे यांच्या नावाला संचालक विश्वास पाटील हे सूचक तर संचालक नविद मुश्रीफ अनुमोदक आहेत. डोंगळे यांची एकमताने निवड झाली. याप्रसंगी संचाालक अभिजीत तायशेटे,अजित नरके, नंदकुमार ढेंगे, कर्णसिंह गायकवाड, बाबासाहेब चौगले, संभाजी पाटील, प्रकाश पाटील, अमरसिंह पाटील, बयाजी शेळके, बाळासो खाडे, अंबरिषसिंह घाटगे, युवराज पाटील, मुरलीधर जाधव, श्रीमती अंजना रेडेकर, कर्यकारी संचालक योगेश गोडबोले आदि उपस्थित होते.