महाराष्ट्र न्यूज वन प्रतिनिधी कोल्हापूर : राज्यातील खाजगी प्राथमिक अनुदानित शाळातील शिक्षक, सेवानिवृत्त कर्मचारी व राष्ट्रीय वेतन योजना धारकांना सातवा वेतन आयोगाचा तिसरा हप्ता देण्याबाबतचे आदेश तातडीने द्यावेत अशी मागणी लेखी निवेदनाद्वारे राज्याचे शिक्षण संचालक यांच्याकडे महाराष्ट्र राज्य मान्य खाजगी प्राथमिक शिक्षक व शिक्षकेतर महासंघाच्या वतीने करण्यात आली आहे.
सरकारने ९ मे २०२२ रोजी शासकीय कर्मचारी व इतर विभागातील कर्मचाऱ्यांना सातव्या वेतन आयोगाच्या थकबाकीतील तिसरा हप्ता सदर कर्मचाऱ्यांच्या फंडात व सेवानिवृत्त व एनपीएस धारक कर्मचाऱ्यांना रोखीने देण्याबाबतचे आदेश निर्गमित केले आहेत. सदरच्या आदेश खाजगी अनुदानित शाळांना लागू असून एक वर्ष उलटून गेले तरी खाजगी शाळातील शिक्षक ,सेवानिवृत्त कर्मचारी व एनपीएस धारकांना सदरचा हप्ता मिळालेल्या नाही._
सरकारने२४ मे २०२३ रोजी सातव्या वेतन आयोगाच्या थकबाकीतील चौथा हप्ता देण्याचे आदेश निर्गमित केले आहेत. तरी खाजगी अनुदानित शाळातील कर्मचाऱ्यांचा मागील तिसऱ्या हप्त्यासह चौथा हप्ता जमा करण्याचे आदेश राज्याचे शिक्षण संचालक यांनी सर्व शिक्षणाधिकारी तथा वेतन पथक अधीक्षकांना द्यावेत अशी मागणी निवेदनाद्वारे करण्यात आली आहे.
मागणीचे निवेदन सहाय्यक शिक्षण संचालक सुभाष चौगुले यांनी स्वीकारले.यावेळी महासंघाचे राज्यसचिव राजेंद्र कोरे व विभागीय सचिव राजाराम संकपाळ उपस्थित होते.