कोल्हापूरला पाणीपुरवठा करणाऱ्या सर्वच पंपिंग स्टेशन मधील पंपांची व अन्य साधनांची परिस्थिती विदारक झालेली आहे. भाजपा पदाधिकारी व माजी नगरसेवकांनी शिंगणापूर पंपिंग स्टेशनला भेट दिली असता ही परिस्थिती दिसल्यामुळे त्यांनी आज आयुक्तांबरोबर बैठकीची मागणी केली होती. त्यानुसार माजी महापौर सुनील कदम, भाजपचे जिल्हाध्यक्ष राहुल चिकोडे, अशोक देसाई, विजय जाधव, हेमंत आराध्ये, दिलीप मैत्रिणी यांच्यासह शिष्यमंडळ प्रशासक कार्यालयात बैठकीसाठी आले. सुरुवातीला शिंगणापूरचे तीन पंप दुरुस्त करण्याचा डिसेंबर २०२१ मध्ये दिलेल्या प्रस्तावाची फाईल पहावयास द्या अशी मागणी कार्यकर्त्यांनी केली. यावर अधिकारी कोणतेही संयुक्तिक उत्तर देईनात आणि फाईल दाखवण्यास टाळाटाळ केली. याप्रश्नी कार्यकर्त्यांनी जोपर्यंत फाईल दाखवत नाही तोवर इथून जाणार नाही, फाईल नाही असे सांगा आम्ही पोलीसात करू असे प्रशासनाला ठणकावले. 

 यावेळी पाणीपुरवठा विभागाकडे मंजूर पदे, रिक्त पदे, एकूण उपसा होणारे पाणी व बिलिंग होणारे पाणी, काही वर्षांपूर्वी एका कंपनीने केलेल्या सर्वेक्षणात दृष्टोत्पत्तीस आलेल्या मोठ्या गळत्या आणि ए बी वॉर्ड मध्ये काम करणाऱ्या कनिष्ठ अभियंत्याचा भ्रष्टाचार, धोत्री गल्ली येथे दोन वर्षे येणारे मैला व आळ्या मिश्रित पाणी इत्यादी मुद्दे अजित ठाणेकर, विजयसिंह खाडे पाटील, संदीप कुंभार, प्रकाश घाटगे, विजय आगरवाल यांनी मांडले. तसेच संजय सावंत, प्रदीप उलपे चंद्रकांत घाडगे मंगल निपाणीकर यांनी जल अभियंता व प्रभारी सहाय्यक अभियंता यांच्यावर प्रश्नांचा भडीमार केला. 

यावेळी उपाध्यक्ष राजू मोरे, सचिन तोडकर, डॉ.सदानंद राजवर्धन, आशिष कपडेकर, प्रीतम यादव, सचिन सुतार, प्रवीणचंद्र शिंदे, महेश यादव, सुजाता पाटील, सिद्धेश्वर पिसे, ओंकार गोसावी, ओंकार खराडे उपस्थित होते.