महाराष्ट्र न्यूज वन प्रतिनिधी कोल्हापूर : शिर्डीहून परत येत असताना इचलकरंजीतील विद्यार्थिनींच्या सहलीच्या बसला शनिवारी (३१ डिसेंबर) पहाटे बारामती- फलटण रोडवर अपघात झाला. या अपघातात सत्तावीस मुली जखमी आहेत. त्यांच्यावर बारामती हॉस्पिटलमध्ये उपचार सुरू आहेत.
इचलकरंजी येथील सागर क्लासेसच्या आठवी ते दहावीत शिकणाऱ्या विद्यार्थिनींची सहल औरंगाबाद, वेरूळ शनिशिंगणापूर, शिर्डी या भागात गेली होती. यशोदा ट्रॅव्हल्सच्या खाजगी बसने ४८ विद्यार्थिनी व पाच शिक्षक सहलीसाठी गेले होते. शिर्डीहून परत येत असताना शनिवारी पहाटे बारामती-फलटण रोडवर खाजगी बसचा अपघात झाला. पाहुणेवाडी गावानजीकच्या पुलावर हा अपघात झाला. चालकाचे नियंत्रण सुटल्याने बस रस्त्यावरून ओढ्यात गेली. या अपघातात 24 मुली किरकोळ जखमी झाल्या आहेत. तीन विद्यार्थिनींना गंभीर दुखापत झाली. पोलिसांनी व स्थानिक नागरिकांनी जखमींना हॉस्पिटलमध्ये हलविले. जखमी विद्यार्थिनींच्यावर बारामती हॉस्पिटलमध्ये उपचार सुरू आहेत. आमदार रोहित पवार यांनी हॉस्पिटलला भेट देऊन जखमींची विचारपूस केली